महाराष्ट्राच्या राजकारणात महत्त्वाचा वळण उपमुख्यमंत्रीपदासाठी सुनेत्रा पवार यांचे नाव चर्चेत

मुंबई: महाराष्ट्राच्या राजकारणात आणखी एक महत्त्वाचा निर्णय होण्याची शक्यता निर्माण झाली आहे. उपमुख्यमंत्री अजित पवार यांच्या पत्नी सुनेत्रा पवार यांना उपमुख्यमंत्रीपद देण्याबाबत सत्ताधारी वर्तुळात जोरदार चर्चा सुरू आहे. उद्या सायंकाळी ५ वाजता त्यांचा शपथविधी होण्याची शक्यता असल्याची माहिती राजकीय सूत्रांकडून मिळत आहे. या पार्श्वभूमीवर मुख्यमंत्री देवेंद्र फडणवीस यांच्याशी राष्ट्रवादी काँग्रेस पक्षाच्या (एनसीपी) प्रमुख नेत्यांनी आज बैठक घेतली. आगामी स्थानिक स्वराज्य संस्थांच्या निवडणुका, विशेषतः पुणे जिल्हा परिषद निवडणूक लक्षात घेऊन पक्षाला स्पष्ट दिशा देण्यासाठी महत्त्वाचे निर्णय घेण्याची गरज असल्याचे या बैठकीत मांडण्यात आले. सुनेत्रा पवार यांना उपमुख्यमंत्रीपदासह उत्पादन शुल्क (एक्साईज) आणि क्रीडा विभागाची जबाबदारी देण्याची शक्यता वर्तवली जात आहे. हे विभाग राजकीय आणि प्रशासकीयदृष्ट्या महत्त्वाचे असल्याने त्यांच्या भूमिकेकडे सर्वांचे लक्ष राहणार आहे. अजित पवार यांच्या राजकीय वारशाला पुढे नेण्यासाठी तसेच पक्षाला नवी ऊर्जा देण्यासाठी हा निर्णय घेतला जाऊ शकतो, अशी चर्चा आहे. महिलांचा सहभाग वाढवणे, ग्रामीण भागात पक्षाची पकड मजबूत करणे आणि संघटनात्मक बांधणी अधिक प्रभावी करणे हा या निर्णयामागील उद्देश असल्याचे मानले जात आहे. मात्र, या संदर्भात अद्याप अधिकृत घोषणा झालेली नाही. उपमुख्यमंत्रीपदाचा निर्णय अंतिम होणार की केवळ चर्चा स्तरावरच राहणार, याकडे राज्यातील राजकीय वर्तुळाचे लक्ष लागले आहे. येत्या काही तासांत याबाबत स्पष्टता येण्याची शक्यता आहे.