కాటారం బీసీ గురుకుల పాఠశాలలో తహశీల్దార్ ఆకస్మిక తనిఖీ.

కాటారం, అక్టోబర్ 01 మేడిగడ్డ టీవీ న్యూస్ :  జయశంకర్ భూపాలపల్లి జిల్లా కాటారం మండల కేంద్రంలోని మహాత్మా జ్యోతిబా ఫూలే బీసీ సంక్షేమ గురుకుల విద్యాసంస్థను గురువారం కాటారం తహశీల్దార్ నాగరాజు ఆకస్మికంగా తనిఖీ చేశారు. గురుకుల పాఠశాలలో విద్యార్థులకు అందుతున్న సౌకర్యాలు, విద్యా వాతావరణం, భోజన నాణ్యత, పారిశుద్ధ్య నిర్వహణ తదితర అంశాలను క్షేత్రస్థాయిలో పరిశీలించారు. ఈ సందర్భంగా పాఠశాలలో పనిచేస్తున్న సిబ్బంది వివరాలు, విద్యార్థుల హాజరు, వారి సంఖ్య తదితర అంశాలను తహశీల్దార్ నాగరాజు పరిశీలించారు. అనంతరం విద్యార్థులకు అందిస్తున్న భోజనాన్ని పరిశీలించి, వంటగదిని సందర్శించారు. వంటకు ఉపయోగిస్తున్న సరుకులు, వంటగది పరిసరాల పరిశుభ్రత, భోజన తయారీ విధానం తదితర అంశాలను పరిశీలించారు. అలాగే స్టోర్ రూమ్‌ను తనిఖీ చేసి అక్కడ నిల్వ ఉంచిన సరుకుల వివరాలను పరిశీలించారు. పాఠశాల ఆవరణలో పారిశుద్ధ్య పరిస్థితులు, విద్యార్థుల వినియోగానికి సంబంధించిన మరుగుదొడ్ల నిర్వహణ, పరిసరాల పరిశుభ్రతను కూడా పరిశీలించారు. విద్యార్థులకు అవసరమైన వసతులు సక్రమంగా అందుతున్నాయా లేదా అనే విషయాలను అధికారులను అడిగి తెలుసుకున్నారు. 

తనిఖీలో భాగంగా తహశీల్దార్ నాగరాజు విద్యార్థులతో నేరుగా మాట్లాడారు. గురుకులంలో అందుతున్న భోజనం, తాగునీరు, వసతి, మరుగుదొడ్లు, పాఠశాల వాతావరణం తదితర అంశాలపై విద్యార్థులను అడిగి వివరాలు తెలుసుకున్నారు. విద్యార్థులు ఎదుర్కొంటున్న సమస్యలు ఏమైనా ఉన్నాయా అనే విషయాలను కూడా తెలుసుకున్నారు. గురుకుల పాఠశాలలో విద్యార్థులకు అందుతున్న సౌకర్యాలను ఎప్పటికప్పుడు పర్యవేక్షించడం ద్వారా వారి సంక్షేమానికి ప్రాధాన్యత ఇవ్వాలని సంబంధిత సిబ్బందికి సూచించినట్లు సమాచారం. తనిఖీ సందర్భంగా పరిశీలించిన అంశాలకు సంబంధించిన వివరాలను చెక్‌లిస్ట్‌లో నమోదు చేసినట్లు అధికారులు తెలిపారు.