కొండా లక్ష్మణ్ బాపూజీ ఆదర్శాలు భావితరాలకు మార్గదర్శకం.

జయశంకర్ భూపాలపల్లి జిల్లా  తెలంగాణ తొలి, మలి దశ ఉద్యమాలకు ఊపిరిపోసి, బడుగు, బలహీన వర్గాలు, చేనేత కార్మికుల హక్కుల కోసం విశేషంగా కృషి చేసిన ఆచార్య కొండా లక్ష్మణ్ బాపూజీ ఆశయాలు భావితరాలకు మార్గదర్శకమని తెలంగాణ రాజ్యాధికార పార్టీ భూపాలపల్లి జిల్లా అధ్యక్షుడు రవి పటేల్ అన్నారు. బాపూజీ జయంతి సందర్భంగా ఆయన చిత్రపటానికి పూలమాల వేసి ఘన నివాళులర్పించారు.

ఈ సందర్భంగా రవి పటేల్ మాట్లాడుతూ.. తెలంగాణ ప్రజల హక్కులు, స్వరాష్ట్ర సాధన కోసం కొండా లక్ష్మణ్ బాపూజీ తన మంత్రి పదవిని సైతం త్యాగం చేశారని గుర్తుచేశారు. పదవుల కంటే ప్రజల ఆకాంక్షలకే ప్రాధాన్యతనిచ్చిన ఆయన త్యాగం, పోరాట స్ఫూర్తి అందరికీ ఆదర్శమన్నారు. బడుగు, బలహీన వర్గాలు, చేనేత కార్మికుల అభ్యున్నతికి బాపూజీ చేసిన సేవలు చిరస్మరణీయమని పేర్కొన్నారు.

బాపూజీ ఆశయాలను ముందుకు తీసుకెళ్లేందుకు ప్రతి ఒక్కరూ కృషి చేయాలని రవి పటేల్ పిలుపునిచ్చారు. సామాజిక న్యాయం కోసం ఆయన చూపిన మార్గంలో పయనించడమే బాపూజీకి అందించే నిజమైన నివాళి అని అన్నారు. కార్యక్రమంలో పార్టీ నాయకులు, ప్రతినిధులు, కార్యకర్తలు పాల్గొని బాపూజీ చిత్రపటానికి పూలమాలలు వేసి నివాళులర్పించారు.