రోడ్డు పనులతో విద్యార్థులకు రవాణా ఇబ్బందులు.

చెల్పూర్, సెప్టెంబర్ 22: జయశంకర్ భూపాలపల్లి జిల్లా చెల్పూర్ మండలం బసవరాజుపల్లి మీదుగా గణపురం వైపు నడిచే బస్సు రాకపోకలకు రోడ్డు పనుల కారణంగా అంతరాయం ఏర్పడటంతో విద్యార్థులు తీవ్ర ఇబ్బందులు ఎదుర్కొంటున్నారని ఐసా విద్యార్థి సంఘం జిల్లా అధ్యక్షురాలు బుర్ర స్వాతి తెలిపారు.

బసవరాజుపల్లి నుంచి గణపురం వెళ్లే ప్రధాన రహదారిలో ప్రస్తుతం రోడ్డు పనులు కొనసాగుతున్నందున బస్సు రాకపోకలకు ఇబ్బందులు ఎదురవుతున్నాయని డ్రైవర్ విద్యార్థులకు తెలిపినట్లు ఆమె పేర్కొన్నారు. దీంతో పాఠశాలలు, కళాశాలలకు వెళ్లే విద్యార్థులు సమయానికి చేరుకోలేక ఇబ్బందులు పడుతున్నారని తెలిపారు.

విద్యార్థుల చదువుకు ఆటంకం కలగకుండా ప్రత్యామ్నాయ మార్గంలో బస్సు సౌకర్యం కల్పించాలని కోరుతూ ఐసా విద్యార్థి సంఘం ఆధ్వర్యంలో సంబంధిత బస్ డిపో మేనేజర్‌కు వినతిపత్రం అందజేశారు. అధికారులు వెంటనే స్పందించి ప్రత్యామ్నాయ మార్గంలో బస్సు నడిపించి విద్యార్థులకు నిరంతర రవాణా సౌకర్యం కల్పించాలని బుర్ర స్వాతి కోరారు.