మేడారం: ప్రపంచ ప్రఖ్యాత మేడారం మహా జాతర సందర్భంగా రాజకీయ వర్గాల్లో ఆసక్తికర చర్చ మొదలైంది. దేవాదాయ శాఖ ఆధ్వర్యంలో జరిగే ఈ మహా ఉత్సవానికి సంబంధిత శాఖ మంత్రి కొండా సురేఖ గైర్హాజరు కావడం ఇప్పుడు హాట్ టాపిక్గా మారింది. జాతర తొలి రోజున సారలమ్మ, పగిడిద్దరాజు, గోవిందరాజులు గద్దెలకు చేరుకున్న సందర్భంగా అరణ్య ప్రాంతం భక్తుల జయజయధ్వానాలతో మారుమోగింది. వనదేవతలకు అధికారికంగా రాష్ట్ర గిరిజన సంక్షేమ మంత్రి సీతక్క స్వాగతం పలికారు. అమ్మవారి నామస్మరణతో మేడారం పరిసరాలు ఆధ్యాత్మిక వాతావరణంతో నిండిపోయాయి. ఈ సందర్భంగా మంత్రి పొంగులేటి శ్రీనివాస రెడ్డి కుటుంబ సభ్యులతో కలిసి మేడారం చేరుకొని అమ్మవార్లకు మొక్కులు చెల్లించుకున్నారు. వేలాది మంది భక్తులు తరలిరావడంతో జాతర ప్రాంగణం కిటకిటలాడింది. భక్తులకు ఎలాంటి అసౌకర్యం కలగకుండా ప్రభుత్వం అన్ని ఏర్పాట్లు పకడ్బందీగా చేపట్టిందని అధికారులు వెల్లడించారు. భద్రత, వైద్య సేవలు, తాగునీరు, రవాణా వంటి సౌకర్యాలు పూర్తి స్థాయిలో అందుబాటులో ఉన్నాయని తెలిపారు. అయితే దేవాదాయ శాఖ ఆధ్వర్యంలో జరుగుతున్న ఈ మహా జాతరకు సంబంధిత శాఖ మంత్రి కొండా సురేఖ హాజరు కాకపోవడం గమనార్హంగా మారింది. ఈ గైర్హాజరుపై ఇప్పటివరకు అధికారికంగా ఎలాంటి ప్రకటన రాకపోయినా, మంత్రుల మధ్య కొనసాగుతున్న అంతర్గత విభేదాలే కారణమని రాజకీయ వర్గాల్లో చర్చ సాగుతోంది. మంత్రి గైర్హాజరు అంశం జాతర వేళ రాజకీయంగా కొత్త చర్చలకు తెరలేపింది. పార్టీ అంతర్గత పరిణామాలు, శాఖల మధ్య సమన్వయం లోపించిందా? అనే ప్రశ్నలు తెరపైకి వస్తున్నాయి. ఈ వ్యవహారంపై పార్టీ అధిష్ఠానం ఎలా స్పందిస్తుందన్నది ఇప్పుడు రాజకీయ వర్గాల్లో ఆసక్తికరంగా మారింది. మరోవైపు భక్తులు మాత్రం రాజకీయాలకతీతంగా అమ్మవారి దర్శనంతో ఆధ్యాత్మిక ఆనందంలో మునిగిపోయారు. మేడారం మహా జాతర మరికొన్ని రోజులు కొనసాగనున్న నేపథ్యంలో భక్తుల సంఖ్య మరింత పెరిగే అవకాశం ఉందని అధికారులు అంచనా వేస్తున్నారు.
Post A Comment: