కాళేశ్వరం త్రివేణి సంగమంలో విషాదం.. పుణ్యస్నానానికి వెళ్లిన భక్తుడు గోదావరిలో గల్లంతై మృతి

కాళేశ్వరం, ఆగస్టు 2: జయశంకర్ భూపాలపల్లి జిల్లా మహదేవపూర్ మండలం కాళేశ్వరం త్రివేణి సంగమంలో ఆదివారం విషాద ఘటన చోటుచేసుకుంది. పుణ్యస్నానం చేసేందుకు గోదావరిలోకి దిగిన భక్తుడు బొబ్బాల శ్రీనివాస్ రెడ్డి (50) ప్రమాదవశాత్తు బలమైన ప్రవాహంలో చిక్కుకుని కొట్టుకుపోయి మృతి చెందారు. ప్రత్యక్ష సాక్షుల కథనం ప్రకారం, శ్రీనివాస్ రెడ్డి పుణ్యస్నానం చేస్తున్న సమయంలో ఒక్కసారిగా ప్రవాహం ఉద్ధృతంగా ఉండటంతో అదుపుతప్పి లోతైన నీటిలోకి వెళ్లిపోయారు. ఇది గమనించిన అక్కడే ఉన్న నిట్టూరి మహేశ్, దరిపెల్లి శ్రీకాంత్ ప్రాణాలను సైతం లెక్కచేయకుండా గోదావరిలోకి దిగి ఆయనను రక్షించేందుకు తీవ్రంగా ప్రయత్నించారు. అయితే ప్రవాహం వేగంగా ఉండటంతో వారి ప్రయత్నాలు ఫలించలేదు. సమాచారం అందుకున్న స్థానికులు, ఇతర భక్తులు సంఘటనా స్థలానికి చేరుకుని గాలింపు చేపట్టారు. అనంతరం కొంతసేపటి తర్వాత శ్రీనివాస్ రెడ్డి మృతదేహాన్ని గోదావరి నుంచి వెలికితీశారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించినట్లు సమాచారం. ఈ ఘటనతో త్రివేణి సంగమం వద్ద విషాద ఛాయలు అలుముకున్నాయి. పుణ్యస్నానానికి వచ్చిన భక్తులు తీవ్ర దిగ్భ్రాంతికి గురయ్యారు. గోదావరిలో నీటి ప్రవాహం ఎక్కువగా ఉన్న నేపథ్యంలో భక్తులు అప్రమత్తంగా ఉండాలని స్థానికులు సూచిస్తున్నారు. ఈ ఘటనకు సంబంధించిన పూర్తి వివరాలు ఇంకా తెలియాల్సి ఉంది. పోలీసులు కేసు నమోదు చేసి దర్యాప్తు చేపట్టినట్లు సమాచారం.