మహాదేవపూర్ మండలం: అంబటిపల్లిలో విషాదం - స్కూల్ బస్సు ఢీకొని మూడేళ్ల చిన్నారి మృతి

జయశంకర్ భూపాలపల్లి జిల్లా మహాదేవపూర్ మండలం, అంబటిపల్లి గ్రామంలో  అత్యంత విషాదకర ఘటన చోటు చేసుకుంది. సూరారంలోని ఎస్.ఎస్.వి. స్కూల్‌కు చెందిన బస్సు ఢీకొని మూడేళ్ల చిన్నారి అక్కడికక్కడే మృతి చెందింది. సింగనేని మల్లేష్, భాగ్య దంపతుల కూతురైన ఈ చిన్నారి ప్రమాదవశాత్తు స్కూల్ బస్సు కింద పడింది.

ఈ ఘటనలో పాప మెదడు బయటికి వచ్చి సంఘటనా స్థలంలోనే ప్రాణాలు కోల్పోయింది. ఈ దుర్ఘటనతో అంబటిపల్లి గ్రామంలో విషాద ఛాయలు అలుముకున్నాయి. కుటుంబ సభ్యులు, గ్రామస్థులు కన్నీరుమున్నీరుగా విలపిస్తున్నారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.