మహా శివరాత్రి సందర్భంగా పలు మార్గాల్లో దారి మళ్లింపు పోలీస్ కమిషనర్ ఏవీ రంగనాథ్..

ఉమ్మడి వరంగల్ జిల్లా ప్రతినిధి /మాడుగుల శ్రీనివాసశర్మ 

హన్మకొండ ;

 మహా శివరాత్రి పర్వదినం సందర్భంగా గ్రేటర్ వరంగల్ పరిధిలో 18వ తేదీ ఉదయం నుంచి 19వ తేదీ ఉదయం వరకు ట్రాఫిక్ ఆంక్షలు విధిస్తున్నట్టు పోలీస్ కమిషనర్ ఏవీ రంగనాథ్ తెలిపారు. ఈ మేరకు శుక్రవారం ఆయన  తెలిపారు. శివరాత్రి సందర్భంగా ఆలయాలకు భక్తులు వేలాదిగా పోటెత్తే అవకాశం ఉన్నందునా ట్రాఫిక్ మళ్లింపునకు నిర్ణయించినట్టు చెప్పారు. రాకపోకలకు అంతరాయం కలుగకుండా ట్రాఫిక్ నిబంధనలు విధిగా పాటించి సహకరించాలని సీపీ కోరారు.

ట్రాఫిక్ ఏరియాలు..

• ములుగు, పరకాల వైపు నుండి వచ్చే ఆర్టీసీ బస్సులు, మిగితా వాహనాలు పెద్దమ్మగడ్డ, కేయూసీ క్రాస్, పోలీసు హెడ్ క్వార్టర్స్, అంబేద్కర్ జంక్షన్ మీదుగా హన్మకొండ బస్టాండ్ కు రావాలన్నారు.

• హన్మకొండ బస్టాండ్ నుంచి ములుగు, కరీంనగర్ వైపు వెళ్లే వాహనాలు ఏసియన్ శ్రీదేవి మాల్, అంబేడ్కర్, పోలీసు హెడ్ క్వార్టర్స్ జంక్షన్, కేయూసీ క్రాస్ మీదుగా వెళ్లాలి.

• హన్మకొండ బస్టాండ్ నుంచి నర్సంపేట్, తొర్రూర్, భద్రాచలం వైపు వెళ్లే వాహనాలు బాలసముద్రం, అదాలత్, హంటర్ రోడ్ మీదుగా వెళ్లాలి.

• వరంగల్ బస్టాండ్ నుంచి పోస్టాఫీస్, శివ నగర్, పోతన రోడ్, సంతోష్ మాత టెంపుల్, సీఎస్ఆర్ గార్డెన్, హంటర్ రోడ్, అదాలత్ మీదుగా వెళ్లాలి.

• ములుగు క్రాస్ రోడ్ నుంచి హన్మకొండ వైపు వెళ్లే మోటార్ సైకిళ్లు, కార్లు , ఆటోలు, ఇతర వాహనాలు అలంకార్, కాపువాడ మీదుగా హన్మకొండ బస్టాండ్ వైపు వెళ్లాలి.

• ములుగు క్రాస్ రోడ్ నుంచి హన్మకొండ వైపు వెళ్ళే ఆర్టీసీ బస్సులు , పెద్దమ్మగడ్డ, కేయూసీ క్రాస్ పోలీసు హెడ్ క్వార్టర్స్ మీదుగా బస్టాండ్ వెళ్లాలి.

• హన్మకొండ నుంచి వరంగల్ వైపు వెళ్లే మోటార్ సైకిళ్లు, కార్లు, ఆటోలు, ఇతర వాహనాలు మర్కజీ రోడ్డు, కొత్తూర్ జెండా మీదుగా పెద్దమ్మగడ్డ రోడ్డు ద్వారా వెళ్లాలి.