చాకలి ఐలమ్మ పోరాట స్ఫూర్తితో సామాజిక న్యాయం కోసం ఉద్యమించాలి.

జయశంకర్ భూపాలపల్లి జిల్లా: వీరనారి చాకలి ఐలమ్మ పోరాట స్ఫూర్తితో సామాజిక న్యాయం, సమానత్వం కోసం ఉద్యమించాలని తెలంగాణ రాజ్యాధికార పార్టీ జిల్లా అధ్యక్షుడు రవి పటేల్ పిలుపునిచ్చారు. జయశంకర్ భూపాలపల్లి జిల్లా కేంద్రంలో తెలంగాణ రాజ్యాధికార పార్టీ ఆధ్వర్యంలో శనివారం చాకలి ఐలమ్మ జయంతి వేడుకలను ఘనంగా నిర్వహించారు. జిల్లా అధ్యక్షుడు రవి పటేల్ ఆధ్వర్యంలో జరిగిన ఈ కార్యక్రమంలో చాకలి ఐలమ్మ చిత్రపటానికి పూలమాల వేసి ఘన నివాళులు అర్పించారు.

ఈ సందర్భంగా రవి పటేల్ మాట్లాడుతూ.. చాకలి ఐలమ్మ ఒక వ్యక్తి మాత్రమే కాదని, ఒక పోరాట స్ఫూర్తి అని అన్నారు. అణగారిన వర్గాల ఆత్మగౌరవానికి ఆమె ప్రతీకగా నిలిచారని, మహిళా శక్తికి నిదర్శనంగా నిలిచారని పేర్కొన్నారు. భూమి, హక్కులు, ఆత్మగౌరవం కోసం నాటి ఆధిపత్య భూస్వామ్య వ్యవస్థను ఆమె ధైర్యంగా ఎదుర్కొన్నారని తెలిపారు. చాకలి ఐలమ్మ పోరాటం తెలంగాణ చరిత్రలో సామాజిక న్యాయం కోసం జరిగిన ముఖ్యమైన పోరాటాల్లో ఒకటని అన్నారు.

సమాజంలో కులం, వర్గం పేరుతో ఆధిపత్యం చెలాయించే వ్యవస్థలకు వ్యతిరేకంగా ప్రజలు చైతన్యవంతులు కావాల్సిన అవసరం ఉందన్నారు. తరతరాలుగా అవకాశాలకు దూరంగా ఉంచబడిన బహుజనులు, బీసీలు, ఎస్సీలు, ఎస్టీలు, మైనార్టీలు, మహిళలకు రాజకీయ, ఆర్థిక, సామాజిక రంగాల్లో సముచిత వాటా దక్కాలని రవి పటేల్ అన్నారు.

చాకలి ఐలమ్మను గౌరవించడం అంటే ఆమె చిత్రపటానికి పూలమాల వేయడం మాత్రమే కాదని, ఆమె పోరాడిన ఆత్మగౌరవం, భూమి హక్కు, సామాజిక సమానత్వం కోసం నేటి తరంలో చైతన్యం తీసుకురావడమే నిజమైన నివాళి అని అన్నారు. ప్రజల హక్కుల కోసం ప్రతి ఒక్కరూ ఐక్యంగా ముందుకు రావాలని పిలుపునిచ్చారు.

తెలంగాణలో ఏ వర్గానికీ వ్యతిరేకంగా వ్యక్తిగత ద్వేషం తమ పార్టీకి లేదని రవి పటేల్ స్పష్టం చేశారు. అయితే ఆధిపత్య రాజకీయాలు, కుల అసమానతలు, పేదల హక్కులను హరించే విధానాలను మాత్రం ప్రశ్నిస్తామని తెలిపారు. రాజకీయ అధికారం కొద్దిమంది వర్గాల చేతుల్లోనే కేంద్రీకృతం కాకుండా, జనాభాలో మెజారిటీగా ఉన్న బహుజన వర్గాలకు కూడా నిర్ణయాధికారంలో సముచిత భాగస్వామ్యం కల్పించాల్సిన అవసరం ఉందన్నారు.

చాకలి ఐలమ్మ స్ఫూర్తితో ఆత్మగౌరవం, సమానత్వం, సామాజిక న్యాయం, రాజ్యాధికారం అనే లక్ష్యాలతో తెలంగాణ రాజ్యాధికార పార్టీ ముందుకు సాగుతుందని రవి పటేల్ తెలిపారు. ఐలమ్మ ఆశయాలను ప్రజల్లోకి తీసుకెళ్లేందుకు కృషి చేస్తామని అన్నారు.

ఈ కార్యక్రమంలో పార్టీ జిల్లా, మండల నాయకులు, యువజన నాయకులు, కార్యకర్తలు, అభిమానులతో పాటు ఇనుగాల ప్రణయ్ రాజ్, జినుకల శ్రీను, అనంతుల సంపత్, రోడ్డ శ్రీను, అశోక్, వెంకటస్వామి, రమేష్, కిరణ్, రజక ఆనంద్, శ్రీనివాస్ రజక, సుర తిరుపతి తదితరులు పాల్గొన్నారు.