Stay Updated With Medigadda Tv News For The Latest News' Politics, Crime, Business And More From South India's Latest News Day To Day
కాళేశ్వరం, నవంబర్ 2 మేడిగడ్డ టీవీ న్యూస్ : మహారాష్ట్ర ప్రభుత్వ ప్రధాన కార్యదర్శి (సీఎస్‌) రాజేష్ అగర్వాల్, గడ్చిరోలి జిల్లా కలెక్టర్ అవిశాంత్ పాడే సోమవారం జయశంకర్ భూపాలపల్లి జిల్లాలోని ప్రముఖ పుణ్యక్షేత్రమైన కాళేశ్వరాన్ని సందర్శించారు. ఈ సందర్భంగా శ్రీ కాళేశ్వర ముక్తేశ్వర స్వామివారి ఆలయాన్ని దర్శించుకుని ప్రత్యేక పూజలు నిర్వహించారు.కాళేశ్వరం చేరుకున్న మహారాష్ట్ర ప్రభుత్వ ప్రధాన కార్యదర్శి రాజేష్ అగర్వాల్, గడ్చిరోలి జిల్లా కలెక్టర్ అవిశాంత్ పాడేలకు ఆలయ అర్చకులు పూర్ణకుంభంతో సంప్రదాయబద్ధంగా ఘన స్వాగతం పలికారు. అనంతరం ఆలయంలోని బాలాలయంలో ప్రత్యేక పూజలు నిర్వహించి శ్రీ కాళేశ్వర ముక్తేశ్వర స్వామివారిని భక్తిశ్రద్ధలతో దర్శించుకున్నారు. స్వామివారికి ప్రత్యేక పూజలు నిర్వహించి మొక్కులు చెల్లించుకున్నారు.
అనంతరం అభిషేక మండపంలో అర్చకులు వారికి వేదమంత్రాలతో ఆశీర్వచనం అందించారు. స్వామివారి శేషవస్త్రాలతో సత్కరించి తీర్థప్రసాదాలు అందజేశారు.
గోదావరి పుష్కరాల ఏర్పాట్లపై ప్రత్యేక దృష్టిఅనంతరం వారు సరస్వతీ పుష్కర ఘాట్‌ను సందర్శించారు. రాబోయే గోదావరి పుష్కరాల నేపథ్యంలో కాళేశ్వరం ప్రాంతంలో చేపట్టాల్సిన ఏర్పాట్లు, పుష్కరాల ప్రాధాన్యత, భక్తులకు కల్పించాల్సిన సౌకర్యాల గురించి జయశంకర్ భూపాలపల్లి జిల్లా కలెక్టర్ రాహుల్ శర్మ వారికి వివరించారు. పుష్కరాల నిర్వహణకు సంబంధించి ప్రాంతీయంగా ఉన్న ప్రాధాన్యతను, ఘాట్‌ల అభివృద్ధి అంశాలను వివరించారు.
ఆలయ అభివృద్ధి పనుల పరిశీలనఅనంతరం పునర్నిర్మాణంలో ఉన్న శ్రీ కాళేశ్వర ముక్తేశ్వర స్వామి ఆలయ అభివృద్ధి పనులను మహారాష్ట్ర ప్రభుత్వ ప్రధాన కార్యదర్శి రాజేష్ అగర్వాల్, గడ్చిరోలి జిల్లా కలెక్టర్ అవిశాంత్ పాడే పరిశీలించారు. ఆలయ పునర్నిర్మాణ పనుల పురోగతిని అడిగి తెలుసుకున్నారు. ప్రస్తుతం కొనసాగుతున్న నిర్మాణ పనుల తీరును పరిశీలించి, అభివృద్ధి పనులకు సంబంధించిన వివరాలను అధికారులను అడిగి తెలుసుకున్నారు.
ఈ పర్యటనలో జయశంకర్ భూపాలపల్లి జిల్లా కలెక్టర్ రాహుల్ శర్మతో పాటు పలువురు జిల్లా అధికారులు, సంబంధిత శాఖల అధికారులు, ఆలయ అర్చకులు తదితరులు పాల్గొన్నారు.
