జయశంకర్ భూపాలపల్లి, అక్టోబర్ 16 మేడిగడ్డ టీవీ న్యూస్ : జయశంకర్ భూపాలపల్లి జిల్లా బార్ అసోసియేషన్ ఆధ్వర్యంలో శుక్రవారం బతుకమ్మ సంబరాలను ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని నిర్వహించిన ఈ వేడుకల్లో న్యాయమూర్తులు, న్యాయవాదులు, కోర్టు సిబ్బంది ఉత్సాహంగా పాల్గొన్నారు. ఈ కార్యక్రమానికి సీనియర్ సివిల్ జడ్జి తాడూరు మహాతి వైష్ణవి, అడిషనల్ జూనియర్ సివిల్ జడ్జి జి. అఖిల హాజరై వేడుకల్లో భాగస్వాములయ్యారు. ఈ సందర్భంగా సీనియర్ సివిల్ జడ్జి తాడూరు మహాతి వైష్ణవి మాట్లాడుతూ, బతుకమ్మ పండుగ తెలంగాణ రాష్ట్ర సంస్కృతి, సంప్రదాయాలకు ప్రతీకగా నిలుస్తుందని అన్నారు. ప్రకృతిలో లభించే వివిధ రకాల రంగురంగుల పూలను అందంగా పేర్చి, ప్రకృతిని ఆరాధిస్తూ జరుపుకునే బతుకమ్మ పండుగకు ప్రత్యేకమైన ప్రాముఖ్యత ఉందని పేర్కొన్నారు. తెలంగాణ ఆడపడుచులు ఈ పండుగను ఎంతో ఉత్సాహంగా, భక్తిశ్రద్ధలతో, ఆనందోత్సాహాల మధ్య జరుపుకోవడం మన సంస్కృతి, సంప్రదాయాల గొప్పతనాన్ని చాటుతుందని తెలిపారు. బతుకమ్మ పండుగ తెలంగాణ ప్రజల జీవన విధానంతో ముడిపడిన ప్రత్యేకమైన పండుగ అని, తరతరాలుగా వస్తున్న సంప్రదాయాలను భావితరాలకు అందించడంలో ఇలాంటి వేడుకలు కీలక పాత్ర పోషిస్తాయని పేర్కొన్నారు. ప్రకృతితో మానవ జీవితానికి ఉన్న అనుబంధాన్ని చాటిచెప్పే బతుకమ్మ పండుగను అందరూ కలిసి జరుపుకోవడం సంతోషకరమన్నారు.
ఈ కార్యక్రమంలో బార్ అసోసియేషన్ కల్చరల్ సెక్రటరీ జి. ప్రియాంక, మహిళా న్యాయవాదులు కంపే అక్షయ, కే. కవిత, రుబినా, శైలజ లావణ్య పాల్గొన్నారు. అలాగే బార్ అసోసియేషన్ అధ్యక్షుడు కే. సురేష్ కుమార్, ప్రధాన కార్యదర్శి ఆకుల రాములు, న్యాయవాదులు ఇందారపు శివకుమార్, చిర్ల అశోక్ రెడ్డి, నీలం ప్రశాంత్, అకినపల్లి రవికుమార్, సైండ్ల నాగరాజు, ఏద్లపురం శ్రీనివాస్, సంగెం రవీందర్, రాజ్ కుమార్, కాళిదాస్, మొయినుద్దీన్, అడ్మినిస్ట్రేటివ్ ఆఫీసర్ పారిజాతం, కోర్టు సిబ్బంది తదితరులు పాల్గొన్నారు. జిల్లా బార్ అసోసియేషన్ ఆధ్వర్యంలో నిర్వహించిన ఈ బతుకమ్మ సంబరాలు తెలంగాణ సంస్కృతి, సంప్రదాయాల పరిరక్షణకు ప్రతీకగా నిలిచాయి. న్యాయమూర్తులు, న్యాయవాదులు, కోర్టు సిబ్బంది ఒకచోట చేరి పండుగ వేడుకల్లో పాల్గొనడం కార్యక్రమానికి ప్రత్యేక ఆకర్షణగా నిలిచింది.
Post A Comment: