అన్నారం బ్యారేజీలో లభించిన మృతదేహం గుర్తింపు.

జయశంకర్ భూపాలపల్లి జిల్లా మహాదేవపూర్ మండలం అన్నారం సరస్వతి బ్యారేజీ వద్ద లభించిన మృతదేహం గుర్తింపు లభించింది. ఈ ఘటన ప్రాంతంలో తీవ్ర విషాదాన్ని నింపింది. సమాచారం ప్రకారం, గోదావరి నదిలో స్నానానికి వెళ్లిన యువకుడు ప్రమాదవశాత్తు గల్లంతైన ఘటన మంథని పరిధిలో ఇటీవల చోటుచేసుకుంది. ఆ యువకుడే అన్నారం వద్ద లభించిన మృతదేహమని పోలీసులు నిర్ధారించారు. మృతుడు పెద్దపల్లి జిల్లా మంథని పట్టణానికి చెందిన రావికంటి సాయికృష్ణ గా గుర్తించారు. పోలీసుల సమాచారం మేరకు, సాయికృష్ణ స్నానానికి గోదావరి ప్రవాహంలోకి దిగి తిరిగి రాకపోవడంతో కుటుంబ సభ్యులు ఆందోళన చెందారు. బంధువుల ఫిర్యాదు ఆధారంగా మంథని పోలీసులు గల్లంతు కేసు నమోదు చేసి గాలింపు చేపట్టారు. చివరికి ఎగువ నుంచి ప్రవాహంలో కొట్టుకుపోయిన శవం మహాదేవపూర్ మండలం అన్నారం సరస్వతి బ్యారేజీ వద్దకు చేరింది. స్థానికులు మృతదేహాన్ని గమనించి కాళేశ్వరం పోలీసులకు సమాచారం అందించగా, వారు సంఘటనా స్థలానికి చేరుకుని పత్రాలు, దుస్తుల ఆధారంగా గుర్తింపు ప్రక్రియ చేపట్టారు. అనంతరం మంథని పోలీసులు సంఘటనా స్థలానికి వచ్చి దర్యాప్తు నిర్వహించి, మృతదేహాన్ని బంధువులకు అప్పగించారు. ఈ ఘటనపై స్థానికులు తీవ్ర విచారం వ్యక్తం చేశారు. గోదావరిలో స్నానం చేసేటప్పుడు జాగ్రత్తలు తీసుకోవాలని పోలీసులు ప్రజలకు సూచించారు.